Tá lúcháir ar an gComhairle Ealaíon sonraí faoi dheiseanna maoinithe a roinnt i réimse na nDaoine Óga, na Leanaí agus an Oideachais (DÓLO). Ina measc seo tá Coimisiúin, Scéim Ensembles na nÓg, Scéim Phíolótach na nEalaíon i Luathfhoghlaim agus Cúram/Cúram Leanaí ar Aois Scoile agus Cónaitheachtaí DÓLO.

Mar is gnáth, má bhíonn aon cheist agat, déan teagmháil leis an bhfoireann DÓLO chomh luath agus is féidir. Is féidir teagmháil a dhéanamh linn ag ypce@artscouncil.ie  

Coimisiúin DÓLO  

Is é an Déardaoin 23 Feabhra, ar 5.30 i.n. an spriocdháta do choimisiúin DÓLO. 

Is é cuspóir na Dámhachtana Coimisiún coimisiúnú saothair nua ó shaorealaíontóirí a éascú. I réimse DÓLO, d’fhéadfadh an dámhachtain tacaíocht a thabhairt, mar shampla, d’eagraíocht a oibríonn le daoine óga – e.g. scoil, ospidéal, obair óige, luathfhoghlaim, nó suíomh eile oideachais – chun ealaíontóir a choimisiúnú chun saothar nua uaillmhianach a chruthú in éineacht le agus do na leanaí agus na daoine óga sa suíomh sin D’fhéadfadh an dámhachtain tacaíocht a thabhairt d’eagraíocht ealaíon chun obair a choimisiúnú le haghaidh daoine óga ó ealaíontóirí nár coimisiúnaíodh roimhe seo. D’fhéadfadh go n-áireofaí leis sin saothar a choimisiúnú ó ealaíontóirí óga agus ealaíontóirí atá ag teacht chun cinn; ealaíontóirí ó phobail a raibh tearc-ionadaíocht acu in obair na heagraíochta go dtí seo; agus/nó ealaíontóirí atá ag obair ar bhealach atá nua d’obair na heagraíochta. 

Is é €15,000 an t-uasmhéid is féidir a bhronnadh ar gach iarratasóir rathúil. 

Tá tuilleadh eolais ar fáil anseo.

Scéim Ensembles na nÓg  

Is é an Déardaoin 02 Márta ar 5:30 i.n. spriocdháta do Scéim Ensembles na nÓg Is é príomhchuspóir Scéim Ensembles na nÓg tacaíocht a thabhairt do ghrúpaí daoine óga idir deich mbliana d’aois agus 24 bliain d’aois chun saothar uaillmhianach úrnua a chruthú nó dul i ngleic go gníomhach le chéile le saothar uaillmhianach úrnua i bhfoirm ealaíne ar bith. Ní mór go mbeadh triúr ball nó níos mó ná sin i ngrúpaí nó in ensembles. 

Baineann dhá shnáithe le Scéim Ensembles na nÓg. Ba cheart duit an snáithe is oiriúnaí do d’ensemble agus do thogra a roghnú. Ní féidir leat iarratas a dhéanamh ach ar aon snáithe amháin. Is é €10,000 an maoiniú is mó atá ar fáil faoi shnáithe 1 agus is é €25,000 an maoiniú is mó atá ar fáil faoi shnáithe 2. 

Chun tuilleadh eolais a fháil faoin dá shnáithe agus chun na treoirlínte iomlána a léamh, féach anseo

Na hEalaíona sa Luathfhoghlaim agus Cúram/Cúram Leanaí ar Aois Scoile – Scéim Phíolótach 

Tá an Chomhairle Ealaíon i gcomhpháirtíocht leis an Roinn Leanaí, Comhionannais, Míchumais agus Óige (DCEDIY) chun scéim Ealaíona sa Luathfhoghlaim & Cúram (ELC) agus Cúram Leanaí ar Aois Scoile (SAC) a phíolótú.​ Déanfaidh grúpa stiúrtha atá comhdhéanta d'ionadaithe ón Rannóg Luathfhoghlama agus Cúraim agus Cúram Leanaí ar Aois Scoile DCEDIY, cigireacht atá dírithe ar an Oideachas sna Luathbhlianta de chuid na Roinne Oideachais, an Chomhairle Náisiúnta Curaclaim agus Measúnachta (CNCM), an Roinn Turasóireachta, Cultúir, Ealaíon, Gaeltachta, Spóirt agus Meán (DTCAGSM), agus an Chomhairle Ealaíon maoirseacht ar an scéim phíolótach.​ 

Tá sé mar aidhm ag an scéim phíolótach tacú le healaíontóirí gairmiúla agus le heagraíochtaí ealaíon chun oibriú le suíomhanna Luathfhoghlama & Cúraim (ELC)/Cúram Leanaí ar Aois Scoile (SAC), agus mar chuid de, déanfar iniúchadh agus forbairt ar Dhréacht-Phrionsabail maidir le bheith Rannpháirteach sna hEalaíona i bhFoghlaim agus Cúram na Luath-Óige​, a d'fhoilsigh an DCEDIY le déanaí.​ Tá sé mar aidhm aige leanaí idir 0-3, 4-6 agus 7+ a chuimsiú i suíomhanna éagsúla in áiteanna éagsúla ar fud na tíre. Táthar ag súil go nglacfaidh suas le hocht suíomh, agus suas le ceathrar ealaíontóir/eagraíochtaí ealaíon páirt sa scéim phíolótach.  

Cuireann an Chomhairle Ealaíon fáilte roimh iarratais ó ealaíontóirí a bhfuil taithí acu agus eagraíochtaí ealaíon páirt a ghlacadh sa scéim phíolótach.​ Gheobhaidh ealaíontóirí agus eagraíochtaí ealaíon a roghnófar maoiniú chun oibriú le dhá shuíomh ábhartha ar a laghad, agus chun bheith mar chuid de ghrúpa taighde a threoróidh forbairt beartais agus acmhainní sa réimse seo. ​Ní mór d'ealaíontóirí agus d'eagraíochtaí ealaíon cuntas teiste a bheith acu maidir le healaíona ar ardchaighdeán a sholáthar i bhfoghlaim agus cúram na luath-óige.​ 

Tá an Glaoch ar Iarratais ar fáil anseo. Is é an Déardaoin 2 Márta ar 5:30 i.n. an spriocdháta le haghaidh iarratas.

Scéim Cónaitheachta d’Ealaíontóirí agus Obair Óige  

Rinneadh an Scéim Cónaitheachta d’Ealaíontóirí agus Obair Óige a dhearadh chun comhpháirtíochtaí nuálacha a chur chun cinn idir grúpaí óige, ealaíontóirí agus eagraíochtaí ealaíon. I measc na gcineálacha cónaitheachta a d’fhéadfadh bheith i gceist, tá ealaíontóir cónaithe i suíomh oibre don óige agus/nó grúpa óige i mbun cónaitheachta i suíomh ealaíon. 

Tá an scéim seo á bainistiú ag Comhairle Náisiúnta Óige na hÉireann thar ceann na Comhairle Ealaíon agus na Roinne Leanaí, Comhionannais, Míchumais, Lánpháirtíochta agus Óige. Tabhair faoi deara go bhféadfadh an dámhachtain bheith faoi réir coinníollacha agus critéar atá éagsúil leo siúd a chuirtear i bhfeidhm maidir le dámhachtainí arna riar go díreach ag an gComhairle Ealaíon. Ba cheart iarratais ar fhaisnéis nó foirmeacha iarratais a sheoladh chuig Clár Náisiúnta Ealaíon na nÓg ag CNÓÉ. Is é an Aoine, 31 Márta ar 12 i.n. an spriocdháta le haghaidh iarratas. Tá tuilleadh eolais ar fáil anseo.

Cónaitheachtaí DÓLO 

Tá an scéim oscailte d'institiúidí Ardoideachais a chuireann Oiliúint Tosaigh Múinteoirí agus/nó cúrsa a leanann ar aghaidh chuig céim leibhéal 7 nó 8 san oideachas nó i gcúram luath-óige ar fáil. Caithfidh institiúidí óstacha iarratas a dhéanamh i gcomhpháirtíocht le healaíontóir nó le heagraíocht ealaíon.   

Beifear ag glacadh le hiarratais ón 7 Márta agus is é an Déardaoin 6 Aibreán ar 5:30 i.n. an spriocdháta.   

Is é €20,000 an t-uasmhéid is féidir a bhronnadh ar gach iarratas rathúil.  

Tugann Cónaitheachtaí DÓLO (Daoine Óga, Leanaí agus Oideachas) tacaíocht d’ealaíontóirí nó d’eagraíochtaí ealaíon bliain acadúil a chaitheamh ina gcónaí in Institiúid Ardoideachais in Éirinn a chuireann Oiliúint Tosaigh Múinteoirí ar fáil (oideachas bunscoile, iarbhunscoile nó breisoideachais) agus/nó cáilíocht aitheanta in oideachas agus i gcúram luath-óige.  Tuilleadh eolais agus treoirlínte ar fáil anseo.

←Fill ar ais go dtí an nuacht