Le linn a théarma mar Laureate i gcomhair Ficsean Éireannach, thug Sebastian Barry air féin ‘aois órga na léitheoirí agus na scríbhneoirí’ a cheiliúradh ar fud na hÉireann, agus, go háirithe, dul i gcion ar phobail léitheoirí a mbeadh rochtain níos teoranta acu ar an litríocht agus ar imeachtaí litríochta. Le beagnach trí bliana anuas, reáchtáladh imeachtaí club leabhar, faoi threoir Sebastian Barry, do dhaoine i suíomhanna cúraim sláinte agus in otharlanna, do dhaoine atá ag teacht chucu féin arís i ndiaidh dóibh a bheith gan dídean agus do dhaoine atá ag maireachtáil faoi sholáthar díreach.

Ó bhí mí Dheireadh Fómhair ann, tá deich gcinn de chlubanna leabhar a théann i gcion ar níos mó ná 100 léitheoir i bpríosúin ar fud na hÉireann tar éis úrscéal Sebastian Barry, The Secret Scripture a léamh. Reáchtáladh na clubanna leabhar in ionaid oideachais ag Cnoc an Arbhair, an Caisleán Riabhach, Ionad Dóchais, Luimneach, Lár Tíre, Muinseo, Aonad Míochaine Mhuinseo, Port Laoise, Mainistir Shelton agus Páirc na Cruithneachta. An tseachtain seo, déanfar imeacht digiteach club leabhar a reáchtáil do na léitheoirí sin leis an Laureate, á mhodhnú ag Janet Fulop – Múinteoir Béarla i bPríosún Luimnigh. Beidh deis ag Sebastian Barry tuairimí na léitheoirí a chloisteáil agus ceisteanna a tháinig aníos le linn a gcuid comhphlé a fhreagairt.   

Ag labhairt dó faoina chlár club leabhar, arsa Sebastian Barry: “Ba phribhléid agus ba chúis áthais dom na ceisteanna agus na tuairimí iontacha a fháil ó bhaill bhreátha seo an chlub leabhar. Ghlac siad leis an dúshlán go fonnmhar. Neartófar go mór spiorad Roseanne, an príomhcharachtar in The Secret Scripture, lena gcuid léargas, a ndáimh agus a gcomhbhá.” 

Arsa an tOifigeach Ealaíon i Seirbhís na bPríosún, Tom Shortt: “Mhúscail an tionscadal seo fíorspéis i léitheoireacht na litríochta Éireannaí comhaimseartha mar chuid d’eispéireas an oideachais athdheise. Feictear do phríosúnaigh gurb ionann an fhiosracht chun léamh ar aghaidh, lena fháil amach cad a tharlaíonn agus an chomrádaíocht a thagann chun cinn sna pléghrúpaí club leabhar mar aon leis na deiseanna a fhaigheann siad iad féin a chur in iúl, agus leigheas ar scoiteacht agus ar leadrán na príosúnachta le linn na dianghlasála. Tá beartaithe leanúint den chleachtas seo, an club leabhar a choinneáil le chéile agus leanúint de bheith ag teacht i dtír ar an bhfuinneamh a thagann le grúpa mór léitheoirí, múinteoirí, agus, leoga, scríbhneoirí agus iad ag obair as lámh a chéile, ar an leathanach céanna, ar fud sheirbhís na bpríosún.” 

Bhí an méid seo a leanas le rá ag Sarah Bannan, Ceann na Litríochta ag an gComhairle Ealaíon:  

“Ó ghlac sé leis an bpost mar Laureate i gcomhair Ficsean Éireannach in 2018, chuir Sebastian Barry roimhe teagmháil dhíreach a dhéanamh le léitheoirí. Thug daoine as gach cúlra faoina chuid leabhar le comhbhá agus le samhlaíocht, agus is ábhar misnigh é an díograis seo i leith fhicsean comhaimseartha na hÉireann a fheiceáil ó cheann ceann na tíre. Creideann an Chomhairle Ealaíon go láidir go bhfuil an ceart ag gach duine a chónaíonn in Éirinn na healaíona a chruthú, dul i ngleic leo, taitneamh a bhaint astu agus bheith páirteach iontu; táimid thar a bheith mórtasach a bheith ag comhoibriú le Seirbhís Príosún na hÉireann ar an tsraith seo.”

Comhthéacs 

Is ábhar lúcháire é do Sebastian Barry bealach a aimsiú chun leanúint den chlub leabhar i bpríosúin in ainneoin na ndúshlán uile a thagann leis. Beartaíodh an chéad lá go dtabharfadh sé cuairt ar na ceithre phríosún le haghaidh imeacht an chlub leabhar.  Tar éis bliain dheacair do dhaoine atá faoi choimeád, athosclaíodh ionaid oideachais i mí Mheán Fómhair, rud a d’fhág go bhféadfaí an club leabhar a thosú i ndeich suíomh, le cabhair ó na baill foirne teagaisc tiomnaithe. Chinntigh an fhormáid dhigiteach, cé nach bhfuil sí idéalach, gur féidir an t-imeacht Laureate a sholáthar i ngach suíomh ar bhealach sábháilte.

←Fill ar ais go dtí an nuacht