Tá áthas ar an gComhairle Ealaíon a fhógairt gurb í Yvonne McDevitt an duine ar éirigh léi Dámhachtain Authored Works a bhaint amach in 2021.

Tionscnamh de chuid na Comhairle Ealaíon is ea Authored Works a ceapadh chun saoirse chruthaitheach agus eagarthóireachta a thabhairt d’ealaíontóirí scannán chun saothar scannáin chultúrtha le húdar a dhéanamh.  Cuirfear an tionscadal a n‑éireoidh leis i láthair don chéad uair ag Institiúid Scannán na hÉireann in 2023. 

Ba mhaith leis an gComhairle Ealaíon comhghairdeas a dhéanamh le Yvonne McDevitt as an dámhachtain scannáin seo a bhaint amach agus táimid ag súil leis an scannán a fheiceáil os comhair lucht féachana Éireannach agus idirnáisiúnta nuair a chríochnófar é. 

Teideal an Scannáin KNOCK KNOCK           

Stiúrthóir agus léiritheoir: Yvonne McDevitt 

 Is léiriú scannáin ar an gcóras Soláthair Dhírigh in Éirinn atá faoi threoir ealaíontóra é KNOCK KNOCK.

Casann eisimirceach Éireannach atá ag filleadh ar Éirinn ar dhídeanaí Ruandach go hosnádúrtha i gCnoc Mhuire.
Is saothar de chuid Authored Film é seo a fhiosraíonn Féiniúlacht, Diaspóra, Inimirce agus Geopholaitíocht Chomhaimseartha na hÉireann.

Is Ealaíontóir agus Scannánaí Éireannach í Yvonne McDevitt, a bhfuil go leor gradam buaite aici, a bhíonn ag saothrú sa scannánaíocht neamhfhicsin agus thrialach agus a bhfuil suim aici i stair an chine dhaonna, sa scannánaíocht idirdhisciplíneach agus i dteicneolaíochtaí nua. Tá cúlra fairsing aici san amharclannaíocht agus bronnadh Duais Stiúrthóirí Jerwood uirthi ag an Young Vic Theatre sa bhliain 2002, agus bronnadh Comhaltacht Drámaíochta Judith E. Wilson uirthi ag Ollscoil Cambridge, 2004-06. 

Tugann an príomhscannán faisnéise is déanaí aici, White City (2017), léargas ar dhearcadh uathúil ar chosc taistil na Moslamach a thug Donald J. Trump isteach. Maidir leis an scannán lánfhada aici, Two Graves (2013), agus na gearrscannáin a rinne sí roimhe sin, Horse (2014), Time (2015) agus Blindness (2016), cuireadh i láthair don chéad uair iad agus léiríodh iad ag mórfhéilte scannánaíochta idirnáisiúnta lena n-áirítear, Fleadh Scannán na Gaillimhe, East End Film Festival London agus Festival de Cannes ina measc. Roghnaíodh Yvonne le haghaidh Berlinale Talents ag 64ú Féile Idirnáisiúnta Scannán Bheirlín in 2014 agus bronnadh Scoláireacht na Fraincise uirthi ag Centre Culturel Irlandais i bPáras, sa bhliain 2018. Cuireadh an gearrscannán is déanaí aici BНУТРИ (Inside) i gcrích in 2020 agus cuireadh i láthair don chéad uair é ag Féile Scannán Cannes in 2021. Tá an scannán lánfhada is déanaí aici MYRRH, a ndearnadh scannánú air in Valais na hEilvéise, le cur amach in 2022.  Is Ealaíontóir Scannán Cónaithe í ag UCC le linn 2022. 

←Fill ar ais go dtí an nuacht