Tá iarratais á lorg ag an gComhairle Ealaíon agus ag Coláiste na hOllscoile Corcaigh ó ealaíontóirí scannán iomráiteacha don ról mar Ealaíontóir Scannán Cónaithe in UCC don bhliain féilire 2023.

Tá sé mar aidhm ag an bpost mar Ealaíontóir Scannán Cónaithe, lonnaithe i Scoil na Scannánaíochta, an Cheoil agus na hAmharclainne, deis uathúil a chur ar fáil d’ealaíontóir scannán a chleachtas/a cleachtas a fhorbairt i dtimpeallacht ollscoile agus, ina theannta sin, deis a thabhairt do mhic léinn i scannán agus meáin scáileáin oibriú ar bhealach bríoch le healaíontóir atá i mbun cleachtaidh le linn dóibh a bheith i mbun staidéir.

Eolas faoin gcónaitheacht

Fostófar an tEalaíontóir Scannán Cónaithe don bhliain féilire 2023 agus beidh sé nó sí lonnaithe i Roinn na Scannánaíochta agus na Meán Scáileáin ag UCC.

Beidh dhá chuid ag an gcónaitheacht:

Ó mhí Eanáir go mí an Mheithimh 2023, tacófar leis an Ealaíontóir Scannán Cónaithe chun caidreamh a bhunú le mic léinn agus leis an bhfoireann ollscoile. Déanfaidh an tEalaíontóir Scannán Cónaithe an clár rannpháirtíochta seo a dhearadh, i gcomhar le foireann na hollscoile, agus d’fhéadfadh go mbeadh teagasc dírithe iarchéime, ceardlanna, meantóireacht, imeachtaí poiblí nó gníomhaíochtaí eile a chuireann fuinneamh nua agus uathúil leis an gclár scannánaíochta agus meán scáileáin mar chuid den chlár sin. Is é ceithre uair an chloig in aghaidh na seachtaine an t-uasmhéid ama teagmhála a bheidh ag an ealaíontóir le mic léinn agus leis an bhfoireann agus le linn an ama seo, ní bheidh ar an Ealaíontóir Scannán Cónaithe curaclam príomhúil a sheachadadh.

Ó mhí Iúil go mí na Nollag, tacófar leis an Ealaíontóir Scannán Cónaithe chun díriú go hiomlán ar a gcleachtas féin. 

Is é €30,000 an táille don Ealaíontóir Scannán Cónaithe, le ranníocaíocht €20,000 ón gComhairle Ealaíon agus ranníocaíocht €10,000 ón ollscoil féin. Cuirfidh UCC spás sonrach ar fáil don Ealaíontóir Scannán Cónaithe, áit a mbeidh sé/sí in ann tabhairt faoina gcleachtas cruthaitheach féin ar champas na hollscoile. Chomh maith leis sin, tacóidh UCC leis an gcónaitheacht ó thaobh cúrsaí riaracháin de. Íocfaidh an Chomhairle Ealaíon an táille ina dhá thráthchuid, agus beidh tuairisc dheiridh le cur isteach ag an Ealaíontóir Scannán Cónaithe ag deireadh na cónaitheachta.

Conas Iarratas a Dhéanamh

Ní mór go mbeadh taithí scannánaíochta ag iarratasóirí ar an ról, lena n-áirítear teideal creidiúna amháin ar a laghad acu mar stiúrthóir nó mar scríbhneoir/stiúrthóir ar fhadscannán nó clár faisnéise cruthaitheach a taispeánadh sa phictiúrlann. Le bheith i dteideal iarratas a dhéanamh, ní mór d’iarratasóirí:

• A bheith ina gcónaí i bPoblacht na hÉireann.*
• Is ealaíontóirí gairmiúla cleachtacha iad. Cé nach gá go dtuilleann siad ioncam go leanúnach ná go heisiach óna gcleachtas ealaíon, ní mór do na hiarratasóirí iad féin a aithint agus a bheith aitheanta ag a bpiaraí mar ealaíontóirí gairmiúla atá i mbun cleachtaidh.

  De réir Dhualgas na hEarnála Poiblí um Chomhionannas agus Cearta an Duine, tá an Chomhairle Ealaíon agus COC tiomanta do chinntiú go dtugtar faoi bhearta beartais dearfacha chun na deiseanna céanna a chur chun cinn do gach duine a chónaíonn in Éirinn, beag beann ar inscne, ar ghnéaschlaonadh, ar stádas sibhialta nó teaghlaigh, ar chreideamh, ar aois, ar mhíchumas, ar chine nó ar dhuine den Lucht Siúil. Ina theannta sin, tarraingímid aird ar an gcúlra socheacnamaíoch mar fhoras eile ina gcaithfear comhionannais deiseanna a chinntiú. Dá bhrí sin, cuirimid fáilte roimh iarratais ó gach cuid de shochaí na hÉireann, na tréithe thuasluaite ina measc ach nach bhfuil teoranta dóibh.

Ní mór d’Ealaíontóirí Scannán an méid seo a leanas a chur ar fáil chun iarratas a dhéanamh:

• Togra mionsonraithe. Ba cheart go dtabharfaí achoimre ar fhís an iarratasóra don ról d’Ealaíontóir Scannán Cónaithe agus ar chur chuige molta maidir le teagmháil a dhéanamh le mic léinn, le baill foirne agus leis an ollscoil níos leithne. Ba cheart tagairt a dhéanamh do taithí ábhartha chun tacú leis an togra.
• Ráiteas an ealaíontóra, ar aon leathanach amháin, ina ndéantar cur síos ar an tionchar a bheadh ag an gcónaitheacht ar fhorbairt chleachtas an ealaíontóra sa scannánaíocht.
• CV mionsonraithe, ina leagtar amach teidil chreidiúna scannáin.

Ba cheart iarratais a sheoladh chuigfilmartist@ucc.ie faoi 5.30 pm ar an 13 Deireadh Fómhair. Ní ghlacfar ach le hiarratais i ríomhphost amháin. Ní ghlacfar le hiarratais a gheofar tar éis an spriocdháta sin.

An Próiseas Measúnaithe

Bunóidh an Chomhairle Ealaíon agus UCC coiste roghnúcháin nuair a fhaightear na hiarratais, agus beidh beirt ionadaithe ó UCC, (lena n-áirítear cathaoirleach gan ceart vótála), duine amháin ón gComhairle Ealaíon agus comhalta painéil seachtrach ag a bhfuil saineolas scannánaíochta ar an bpainéal sin. Cuirfidh an coiste roghnúcháin gearrliosta d’iarratasóirí le chéile bunaithe ar na critéir seo a leanas:

• cuntas teiste ealaíonta (sa scannánaíocht) an iarratasóra (agus teideal creidiúna amháin ar a laghad aige nó aici mar stiúrthóir nó mar scríbhneoir/stiúrthóir ar fhadscannán nó clár faisnéise cruthaitheach a taispeánadh sa phictiúrlann san áireamh)
• caighdeán an smaoinimh/chur chuige mar atá le sonrú san iarratas
• an tionchar féideartha a d’fhéadfadh a bheith ag an gcónaitheacht ar chleachtas cruthaitheachta an Ealaíontóra Scannán féin
  
  

Bunófar gearrliosta (ní bheidh níos mó ná seisear iarratasóirí ar an ngearrliosta). Iarrfar ar iarratasóirí a chuirtear ar an ngearrliosta dul faoi agallamh go luath i mí na Samhna. Reáchtálfar an t-agallamh trí ghlaoch físchomhdhála. Tabharfaidh sé an deis do na hiarratasóirí atá ar an ngearrliosta a bhfís agus a dtaithí a phlé go mion. Déanfaidh an painéal an cinneadh deiridh bunaithe ar na critéir thuasluaite.

*Cuirtear eisceachtaí ar leith i bhfeidhm a chiallaíonn go measfar iarratasóirí a bheith incháilithe má éiríonn leo cleachtas ealaíon a mbainfear tairbhe as do na healaíona i bPoblacht na hÉireann a chur in iúl. 

←Fill ar ais go dtí an nuacht