Photo: Steve Langan

Tá P.J. Lynch ag obair mar mhaisitheoir leabhar do pháistí ó d'fhág sé Coláiste Ealaíne Brighton i Sasana sa bhliain 1984. Tá go leor duaiseanna buaite aige lena n-áirítear Gradam Mother Goose, Bonn Christopher faoi thrí agus Bonn Kate Greenaway a bhfuil ardchlú air faoi dhó: an chéad cheann le haghaidh The Christmas Miracle of Jonathan Toomey  le Susan Wojciechowski agus an dara ceann le haghaidh When Jessie Came Across the Sea  le Amy Hest.D'ainmnigh Rannán na hÉireann de chuid Bhord Idirnáisiúnta na Leabhar do Dhaoine Óga (International Board on Books for Young People)  faoi dhó é le haghaidh Ghradam Hans Christian Andersen. Díoladh os cionn milliún cóip den leabhar The Christmas Miracle of Jonathan Toomey  sna Stáit Aontaithe amháin, agus rinneadh scannán de ar na mallaibh.

Bhí P.J. Lynch ina léachtóir ar a chuid saothar féin agus ar Ealaín agus Maisiú i nDánlann Náisiúnta na hÉireann, in Áras Nua-Ealaíne na hÉireann, i Leabharlann Náisiúnta na hÉireann agus i Músaem Náisiúnta Cló na hÉireann, agus ag an dúrud comhdhálacha agus coláistí ar fud na hEorpa agus na Stát Aontaithe. Fuair Leabharlann Náisiúnta na hÉireann agus an Músaem Náisiúnta Cló seilbh ar dhá bhailiúchán mhóra dá chuid saothar. Sa bhliain 2014, bronnadh Sparánacht Litríochta na Comhairle Ealaíon ar P. J. Lynch chun cúnamh a thabhairt dó a leabhar, The Boy Who Fell off the Mayflower, a chríochnú. Tá cónaí ar P. J. Lynch i mBaile Átha Cliath lena bhean chéile agus a dtriúr páistí óga.

Cad a spreag tú a chéaduair le bheith i do mhaisitheoir?  

Bhínn i gcónaí ag gabháil don líníocht nuair a bhí mé óg. Dá bhrí sin, glacadh leis go mbeinn ag plé leis an ealaín nuair a d'fhásfainn aníos. Ba bheag a bhí ar eolas agam faoi obair na maisitheoirí an t-am sin, áfach. Chonacthas dom go tapa sa Choláiste Ealaíne go raibh an dea-líníocht ar bun sna rannóga dearaidh agus maisiúcháin agus chlaon mé i dtreo an réimse sin dá thoradh sin. Bhí an t-ádh orm nuair a chuaigh mé go dtí an coláiste thall in Brighton go raibh roinnt maisitheoirí iomráiteacha leabhar ar an bhfoireann teagaisc ansin. Ba é Raymond Briggs - a chruthaigh The Snowman - an duine ab fhearr aithne acu, agus d'éirigh le roinnt de mhic léinn na linne sin ón gcoláiste in Brighton gairm mhaith a dhéanamh dóibh féin i réimse na leabhar do pháistí.

Fearacht mórán maisitheoirí agus scríbhneoirí, déanaim mo dhícheall cloí le sceideal oibre réamhshocraithe. I mo chás féin, bainim an stiúideo amach thart ar 9am agus is féidir liom a bheith ag obair go dtí 5.45pm. Ar an drochuair, mura mbíonn an obair ag rith go maith, tig liom bunús an ama sin a chaitheamh ag únfairt le míreanna gnó a bhíonn le réiteach. Is gnách go luím isteach ar roinnt fíorobair phéinteála nó líníochta san iarnóin, mar sin bíonn sé deacair éalú uaithi ag deireadh an lae. Maidir liom féin, bím níos cinntithí agus níos táirgiúla nuair a bhíonn spriocdháta díreach romham.

Bhí sé an-deacair mo leabhar faoin Mayflower agus na hOilithrigh a scríobh agus bhí sé go hiomlán difriúil ó mo chuid líníochta agus péinteála. Thug mé faoi deara nach raibh mé in ann aon rud a bhaint amach ach amháin nuair a bhí mé ar shiúl ón teaghlach agus ón Idirlíon, agus na spriocdhátaí maisiúcháin.

Bhí mé ag plé leis an leabhar a bhí ar intinn agam a scríobh faoin Mayflower ar feadh roinnt blianta agus bhí mé thar a bheith sásta gur thaitin an chéad dréacht den scéal le mo chuid foilsitheoirí nuair a thaispeáin mé dóibh é. Chuir mé dua orm féin, áfach, leis an téacs a ghiorrú agus scéal iontach a chruthú. Tar éis an mhéid sin uile, b'éigean dom os cionn daichead pictiúr an-mionsonraithe a chruthú. Thabharfadh sé thart faoi dhá bhliain é sin a chur i gcrích. Cé go raibh mo chuid foilsitheoirí an-fhlaithiúil agus boigéiseach liom riamh anuas, thug an dámhachtain sparánachta ón gComhairle Ealaíon beagán ama breise dom chun an leabhar a chríochnú de réir an chaighdeáin chuí dar liom.

Chuir an dámhachtain go mór le mo mhuinín mar scríbhneoir toisc gur bronnadh Dámhachtain Litríochta orm agus mé i mo mhaisitheoir ó ghairm.

Cad í an chomhairle ab fhearr a cuireadh ort go luath i do ghairm?  

Déan do dhícheall i ngach post beag beann ar an airgead a bhíonn i gceist.

Cad iad na maisitheoirí a d'imir an méid is mó tionchar ar do chuid saothar?   

Nuair a bhí mé i mo mhaisitheoir óg, bhí mé an-tógtha le saothar na n-ealaíontóirí Arthur Rackham agus Edmond Dulac. Níorbh fhada gur chuir mé an-spéis i saothar mhaisitheoirí Meiriceánacha na ré Órga macasamhail Maxfield Parrish agus NC Wyeth, chomh maith le Norman Rockwell. Is maisitheoir comhaimseartha é Alan Lee a bhfuil an-aird agam ar a chuid saothar.